Psa 53 | TwiNAK | STEP | Nkwaseafo ka wɔ wɔn koma mu se, “Onyankopɔn bi nni baabi.” Wɔn nyinaa yɛ amumɔyɛfo a wɔayɛ bɔne akɛseakɛse a wɔn mu baako koraa nni hɔ a ɔyɛ ade pa.

Psalms 53

Nnipa amumɔyɛ

1 Nkwaseafo ka wɔ wɔn koma mu se, “Onyankopɔn bi nni baabi.” Wɔn nyinaa yɛ amumɔyɛfo a wɔayɛ bɔne akɛseakɛse a wɔn mu baako koraa nni hɔ a ɔyɛ ade pa.
2 Onyankopɔn hwɛ nnipa mma wɔ fam fi soro hwɛ sɛ obehu anyansafo bi wɔ wɔn mu a wɔbɛsom no.
3 Nanso wɔn nyinaa atwa wɔn ani; wɔn nyinaa yɛ bɔne pɛ.
Wɔn mu baako po nyɛ ade trenee; ɔbaako mpo nni hɔ.
4 Onyankopɔn bisa se, “Wonnim anaa?
Saa nnebɔneyɛfo yi nnim anaa?
Wɔbɔ me nkurɔfo korɔn de tena ase nanso wɔmmɔ me mpae.”
5 Nanso ahopopo bi a ebi nkaa wɔn da bɛka wɔn.
Onyankopɔn bɛbɔ ne nkurɔfo atamfo nnompe apansam.
Onyankopɔn apo wɔn, na saa ara na Israel bedi wɔn so pasaa ne no.
6 Me mpae ne sɛ, nkonimdi befi Israel aba Sion.
Sɛ Onyankopɔn ma ahotɔ ba Israel a, dɛn ahotɔ na wɔrennya?